1391間中醫院賣清冠1號 網路就通查佗位有貨

國內確診數增加了後,民眾對清冠一號的需求嘛有提升。有袂少民眾想欲買,煞毋知佗一間醫療院所有提供。衛福部的中醫藥研究所佮中醫師公會全國聯合會,這馬推出公費清冠一號動態表,方便民眾查詢有提供的醫療院所佮逐工的庫存量。毋過看起來,這陣猶是誠欠貨。

點開網站,透過衛福部中醫藥研究所佮中醫師公會全國聯合會製作的列表,就會使查著全國1391間有公費清冠一號的醫療院所、閣有存量,毋過真濟院所目前攏寫無貨。

中醫師公會全國聯合會理事長 柯富揚表示,「我共醫療院所講袂要緊,你就照寫,我相信佇今仔日(5/23)大概真濟藥廠攏共藥仔寄出來矣。阮每禮拜五藥廠會提供會使提供的清冠一號數量,阮嘛會要求醫療院所每暗的十二點一定愛去更新。」

目前清冠一號供貨狀況差不多盡磅矣,中醫藥研究所表示,清冠一號的產能會對目前每個月15萬人份閣再提懸,這馬有八間藥廠當咧生產,未來閣會有六間藥廠陸續加入。

衛福部國家中醫藥研究所所長 蘇奕彰表示,「阮大概會使供應十五萬人次、五工療程的內容。看起來數字是會使提懸到二、三十萬左右。藥廠佇產能投入了後,後禮拜會陸續提懸。」

本土確診數增加了後,清冠一號需求增加,市面上出現號名「清冠茶包」、「類清冠」等等的商品,衛福部中醫藥司表示,這攏毋是真正的清冠一號,針對其中可能有違法製作的情形,會加強調查處罰。

相關新聞

專題|全台敬老金大調查