屏東縣防疫專線僫敲通 議員:跤手根本按無夠

疫情衝懸,屏東縣政府24點鐘防疫專線,民眾怨講敲一禮拜攏敲袂通,議員現場佇議會測試,敲兩擺專線嘛無人接。衛生局表示,逐工有千外通電話敲入來,未來會閣增加跤手,盡量來解決。

確診者林先生想欲敲防疫專線,煞佮真濟民眾仝款,按怎敲就是無人接。

民眾:「這个電話我已經敲一禮拜矣,無人接。」

屏東縣政府牽的防疫專線,有偌歹敲,有議員佇議會當場敲兩擺,等欲一分鐘,嘛是仝款無人接,質疑衛生局防疫專線跤手無夠。

屏東縣議員 李世斌:「我對頂禮拜一路就按呢敲,講實在的,攏無接通。跤手的配置,跤手相當不足。」

民眾:「確診人數愈來愈濟,應該愛加強防疫,顛倒專線煞敲袂通。」

實際來到接防疫專線的現場,衛生局人員一爿接電話,手嘛無閒拍電腦查資料,閣有電話一直敲入來,in中晝攏無歇睏。

屏東縣衛生局疾管科長 仇幼娟:「一工進線量除了這爿,阮閣有另外一个醫療關懷中心專線,干焦局內一工一千外通,每時每刻攏是高峰期。」

屏東確診人數突破兩千人,防疫專線對原底一線擴充到十二線,逐工干焦六个人接電話,致使專線大窒車,衛生局表示會閣增加跤手,盡量解決民眾的需求。

相關新聞

專題|全台敬老金大調查