今著發隔離單.試劑 老師指控工課沓滴.做袂離

全國教師工會總聯合會5/6開記者會,講這馬疫情嚴重,基層教師的工課量也攏超磅;除了愛準備課程,閣愛協助疫情相關的工課,親像是發居家隔離單、快篩試劑等等,實在是做袂離,呼籲中央愛想辦法解決。

疫情嚴重,真濟學生確診、停課,學校老師這馬除了上課以外,也愛負責校內的防疫工課,親像發快篩試劑、防疫包予學生等等。有老師不滿,向全國教師工會聯合會投講,家己袂輸兼職咧做送貨員。

全教總理事長 侯俊良:「假使講,若家長是這个時間伊袂當到學校領,老師是毋是愛按呢去學校,應付伊拜六禮拜來領取的情況;甚至有一寡可能是連家長攏居家隔離,攏無法度出門,有一寡所在,可能甚至閣愛請老師送到厝裡。」

全教總表示,最近有真濟第一線的教師陳情,政策直直改,地方政府佮中央指令無仝,甚至愛IN負擔原本屬於社政佮醫療體系的工課,予IN真大的壓力,另外也有老師臨時拄著確診者,若欲揣代課、無相關證明,代課費用愛按怎處理,線頂實體工課超磅等等,攏希望政府提出方向。

全教總副秘書長 李雅菁:「然後紲落來,應該愛予閣較濟的,包括公假排代的認定會使放較冗,應該愛閣較會當伸勼。閣來一个真重要的是,老師逐工攏咧加班,敢有適當的補歇?我感覺這是一个足卑微的要求佮請求。」

全教總呼籲,政府單位應該簡化校園的防疫作法,正視學校的需求,若必須將醫衛社政的工課放予學校,也希望補充相關的物資佮人力。

九合一選戰解析

相關新聞