傳藝中心推動野台戲 招嘉義王靈宮連紲搬五工

佇台灣若講著外台戲,一般是佇廟口拜拜謝神,才會有演出,國立傳統藝術中心,為著欲予民眾佇平常時仔嘛會當看著精彩的戲劇,這馬當咧全國推動,重現民間劇場的計畫,嘉義市對4/30暗時開始,一直到5/4,連紲5工,佇王靈宮廟埕搬戲予逐家看。

廟埕的舞台頂起鼓扮仙,嘉義市王靈宮的廟埕鬧熱的氣氛,好親像是神明生仝款,為著欲予民眾佇平常時嘛會當看野台戲,廟方配合國立傳統藝術中心,連紲五工佇廟埕搬傳統戲劇。

嘉義市長 黃敏惠表示:「這是傳藝中心嘛是文化部支持的,希望傳統戲劇開枝散葉,會當來釘根。」

王靈宮主委 蔡明宏表示:「一寡仔傳統文化佮地方的戲劇,有足大的幫助。」

國立傳統藝術中心主辦的重塑民間劇場演出,今年已經是第五冬,除了嘉義以外,紲落來閣會佇桃園、台南佮彰化演出,欲用一日一團的方式,予到廟口看戲的民間文化,會當成做新的藝文活動。

傳藝中心劇藝發展組科長 游庭婷表示:「阮佮廟方來協調,搭一个品質較好的戲棚,然後包括有好的燈光 好的音響,提懸整個演出的水準,閣透過有品質的演出團隊佮演出現場,吸引民眾轉來廟口看戲。」民眾吳女士表示:「真好,會當予歌仔戲繼續延傳落去,抑無一寡仔少年仔攏毋知影,按呢真好。」

王靈宮表示,舊年配合建廟百年,就有向文化部申請這个演出,落尾因為疫情取消,今年總算成功邀請IN來嘉義,希望透過全國性的戲劇表演,替地方宮廟帶來文化傳承的意義。



 

相關新聞

專題|全台敬老金大調查