快篩實名制第一日實施，民眾會當提健保卡去指定藥局買快篩試劑。毋過早起傷濟民眾攏早去買，造成系統窒車。藥師也呼籲民眾，真正有緊急需要才去買。
快篩試劑徛名制頭工，猶未開始賣藥局外口民眾就排甲躼躼長。
民眾：「七點就來，今仔日頭一工先共準備起來。」
民眾：「阮厝內的囡仔IN學校有學生確診，其實這幾工阮攏真驚惶。雖然伊有做PCR，但是阮猶是煩惱，想講先買、先予囡仔用。」
驚民眾相kheh，藥局早就安排動線，毋過一組五支伍佰箍，逐間藥局一工干焦配著78組，全國有咧賣的藥局、衛生所算起來，四千九百外間，全部的量差不多40萬人份，以全台灣兩千三百萬人來算，干焦1.6葩的人會當提著，所以藥師也呼籲民眾有急用才先買，毋過猶是因為人傷濟發生健保卡登錄系統出現大窒車的突發狀況。
藥師 黃彥儒：「拄仔8點40左右，用的藥局的數量較濟，系統面有延遲的狀況。因為疫情嚴峻，也希望逐家莫群聚，也請健保署愛予系統通閣較順。」
因為全台同步開賣，健保署系統速度慢，藥師只好先共快篩試劑發予民眾，事後補過卡，抑是發號碼牌閣請民眾來領，面對系統爆量，健保署也發聲明表示，因為原本病院院所上傳影像檢核造成系統量能無夠，佇趕緊處理後也恢復正常。指揮中心下晡也表示，4/28估算有41萬外份快篩試劑，到計算前賣出24萬外份，也呼籲民眾試劑是循環式，按順序來買免著急。
