提供獎勵促收容人改薰 10年來食薰比率減1成

法務部長期佮國健署、董氏基金會合作,辦收容人改薰比賽,提供各種獎勵措施佮改薰環境。這十年來收容人食薰的比率降10.7%,受幫贊、順利改薰的更生人也講,成功改薰了後,得著閣較濟尊重。

趕路的雁全人關懷協會輔導主任 蘇哲民:「得著的就像李㼈大兄講的,身體健康的身體和尊重,猶有我佮厝內人一寡和睦和平。任何生活習慣攏足好矣,in就愈來愈相信我。」

捌因為食薰、食毒,14歲就定定出入勒戒所,蘇哲民大約五年前佇監獄改薰成功,今年40歲,佇關懷協會做輔導主任、重新開始。

根據法務部的統計,2012年收容人入獄進前的食薰率超過94%, 佇監獄內食薰的超過83%,到2022年入獄前的食薰率86.46%,佇監獄內食薰的降到72.26%,顯示10年來,收容人食薰率降10.7%。

董氏基金會菸害防制中心主任 林清麗:「比論講你若準備欲改薰,伊就共你徙去改薰的牢房,另外就是有無薰的工場。伊會共你記嘉獎,會當予你厝裡的人加來看你幾改。」

法務部部長 蔡清祥:「收容人in若準會當對這項改薰活動的參與,導向一个正向轉變的話,是誠有意義的。」

法務部佇2010年開始辦收容人改薰比賽,提供各項獎勵措施,包括增加會面機會、記點獎勵,也予in 佇無薰的環境,國健署是希望菸害防制法修正案會當佇新會期通過,針對新型的薰,有閣較濟規範,保障人民健康。

相關新聞

專題|全台敬老金大調查