全民國防手冊教戰場生存 專家:無合戰時狀況

國防部全民防衛動員署12公布全民國防手冊範本,內容主要是提供民眾面對軍事危機、佮相關災害的應變資訊。分做11个部份,包括避難急救方式、災害應變、生存基礎智識佮防備戰準備等等,嘛提供QR Code方便民眾使用。

國防部全動署物力動員處處長劉泰益講,「主要是提供民眾面對軍事危機佮可能發生災難的時,緊急應變資訊,才會使做好安全準備佮生存自助。手冊架構參考瑞典、日本等國家類似手冊,整合各部會佮專家學者等等資訊。」

國防部表示,目前範本已經囥佇國防部網站,提供民眾使用,落尾各縣市會加入地方避難設施、急救病院、民生用品站等等資訊,提供各縣市版本。專家講,國防部的想法真好,毋過執行成果有淡薄仔潦草。

全球防衛雜誌採訪主任陳國銘表示,「猶是愛紙本化,大量發予民眾來使用,至少村里長愛。萬一戰時無電欲按怎?以後不妨透過漫畫的方式,抑是圖表的方式,予民眾一看就真清楚,免閣看文字,因為佇戰爭的時,無人會頂真佇文字。」

專家表示,這擺提出的範本,詳細程度較輸一寡仔民間組織編寫的民防手冊,in認為全動署佇全國期待之下成立到今四個月,干焦提出這款成果並無合格。

全台敬老金大調查

相關新聞