立委籲組"快篩國家隊" 共試劑價數壓落來

因為這馬染著病的症頭變輕,有的民眾身體無爽快會家己先篩檢。毋過目前市面一支快篩試劑愛3百幾箍,就有立委呼籲中央緊插手,共價數壓落來。指揮官陳時表示,除了疫情嚴重的所在有免費快篩,嘛當咧佮業者撨摵,按提供800萬支快篩試劑來壓低價數,應該真緊就有結果。

入來藥局,快篩試劑就囥佇上顯目的所在,藥師講最近銷量明顯變好,進兩種試劑,賣甲只賰遮的。

藥師表示,「阮一工差不多賣幾十支有啦,我進口價大概260箍,你若隨調到100箍,我毋就了死。」

若看試劑價數,市面有咧賣的核酸試劑愛千八,羅氏和福爾威創,抗原試劑愛三百起跳,民眾看法無仝。

民眾講,「有淡薄仔貴。」
民眾講,「我感覺三百其實會當接受,因為共PCR比俗欲十倍。」

疫情行向輕症化,自主快篩需求變大,有立委呼籲中央緊組快篩國家隊,先提供免費快篩,應付這波疫情,同時研擬比照國際行情,壓佇一百左右。

時代力量立委 陳椒華表示,「上好是比照新加坡、韓國會當回歸大批採購,嘛會當共價數壓低,上好是會當佇一百左右。」

中央流行疫情指揮中心指揮官 陳時中表示,「共價數予伊閣較親民、閣較友善,這是阮這馬咧做的代誌,應該真緊有一个結果出來。阮這馬大概以基隆模式,提供相關免費的快篩予一寡仔熱區做使用。」

除了強調參考基隆快篩普及模式,陳時中佇初十早起予人邀請去做專題演講的時,也講當咧研擬800萬劑家用快篩的共同供應契約,試劑價數變俗,應該真緊就有結果。

相關新聞

專題|全台敬老金大調查