小說"虱目仔ê滋味"編做戲劇 搬傳統女性心境
記者 洪敏真 莊沛文 張育睿 / 台中報導
發布時間：
更新時間：
目次
台灣女性台語作家清文，寫的小說《虱目仔ê滋味》，描寫農業時代查某人按怎辛苦扞家，望後生媳婦攏合和的心情，這陣夾腳拖劇團將伊改編做戲劇，揣會曉台語的少年演員，讀台文劇本，也結合半身的和柴頭的尪仔，佇劇場內搬演傳統女性的韌命，也思考現代女性佇家庭的角色和束縛。
92歲的勥姆仔，虯閣儉、勥跤兼雜唸、佇人生最後時間，和伊的靈魂，同齊唱出守寡、顧家、數十年來的苦楚。
「勥姆仔欲起行」演出片段：「這幾若年我佮阿母蹛，煮飯予伊食，閣愛鬥相共，若欲加一份，嘛是阮兜加一份，鬥相共、毋就足gâu的。」
演員陳佳豪講：「每一个媳婦其實攏是用無仝尪仔的形式，猶會有一个真人的演員，佮伊做一个對照，若親像一个人是伊的意識，一个人是伊的肉身，所以我感覺這誠趣味。」
尪仔愛弄了活跳、尪仔師傅的手骨就愛有夠猛掠，這齣夾腳拖劇團佇台中國家歌劇院搬演的「勥姆仔欲起行」，改編對台灣女性台語作家清文寫的小說《虱目仔ê滋味》，呈現農業時代傳統女性按怎辛苦扞家，猶望後生媳婦攏合和的心情。
編導吳易蓁分享講：「這小說內底是寫較古早的代誌、古早的女性，但是現代的女性，猶是有足濟束縛的，這本小說的台語，是真正較困難、較深，所以嘛是有特別選較會曉講台語的演員。」
全台文的劇本，毋但予三十幾歲的少年演員提著時心驚驚，按怎展現傳統女性的韌命，也考驗演技。
演員周羿笑講：「以我實際的年歲愛搬92歲，這个是對我來講，是一个真大的挑戰，當時因為佳豪尪仔師，替我弄這个尪仔，我就是伊、伊就是我，配合了會峇，我感覺是較困難的所在。」
因為疫情這齣戲延了一年，這陣總算佇劇場演出，帶領眾人用台語和女性觀點，看傳統女性面對社會和家庭衝擊，堅強的彼一面。
