臺灣鐵路產業工會不滿臺鐵公司化草案，無經過勞資協商就送立法院，而且4/7就隨欲審查。工會提早召開記者會，強調安全條例若無做甲到，就無應該硬立法，也表示會參加5/1勞動節大遊行，拒絕加班。
台鐵公司化條例草案初7就欲佇立法院審查，毋過台鐵產業工會猶是認為政府愛正視IN的訴求，像安全改革、基層參與等等，要求三承諾三參與。
台鐵產業工會秘書長 魏豫綾：「這六點阮也分別已經送出勞資爭議調解，送出調解申請。所以阮佇遮呼籲交通部佮台鐵局，假使是真正為著台鐵的行車安全，若希望有保障，應該著愛同意工會的訴求，簽白紙烏字。
台鐵產業工會批評，將欲審查的設置條例草案，不斷強調資產財務分配，有關安全的部分猶是真浮冇，雖然交通部長有講過會採納工會版本五項條文，毋過對IN來講無實質的安全條例，全案就無應該強行立法。另外產業工會也宣布，會加入台鐵企業工會的莫加班行動，嘛希望企業工做伙參加勞動節遊行。
台鐵產業工會理事長 王傑：「阮會佇五月初一勞動節的時陣，阮台鐵產工會舉辦、會綴五一的勞團行動，另外阮也呼籲企業工會綴阮做伙參加這个遊行活動。」
台鐵產業工會表示，佇發起五一拒絕加班的連署以來，兩禮拜就收著上千份的同意書，而且猶閣咧增加，IN也呼籲員工愛徛出來爭取權益。面對工會的行動，台鐵表示暫時無欲回應。
