同婚伴侶收養囡仔受制限 民間拚修法保障權益

同性伴侶佇臺灣雖然會使結婚,毋過收養囡仔的權利,閣有袂少阻礙。按照現有法律規定,同性伴侶是無法度做伙收養無血緣的囡仔,嘛代表若是其中一个咧結婚進前收養無血緣的囡仔,結婚了後,伊的同性伴侶嘛無囡仔的親權。今仔日立法委員佮民間團體召開公聽會,佮中央部門討論修法方向。

今年正月,同性伴侶圍爸佮喵爸經過長時間的訴訟,成做全台第一个收養無血緣囡仔的同志家庭。台灣同性婚姻合法化,毋過同性伴侶干焦會使收養有血緣的囡仔、袂使共同收養無血緣的囡仔。這代表若是一方佇結婚前收養無血緣的囡仔,婚後伊的牽手是無法度有囡仔的親權。

同志諮詢熱線秘書長 彭治鏐表示:「其中一个家長若是無細膩有狀況,另外一方就無法度照顧囡仔矣,因為伊佇法律上其實是生份人」

勵馨基金會台北分事務所主任 陳玉禎指出:「阮最近有一對同志伴侶欲做法院送件,in其實是未婚,in知影現行法律結婚就是袂使收養,in真想欲結婚,但是因為有按呢的法律限制」

學者指出,歐美國家有真濟同志收養的經驗,已經有研究指出,同志家庭的囡仔佮異性家庭的囡仔相比並,並無明顯的差異。衛福部佮司法院分別表示,已經有開放的相關準備佮支持的態度,但是法務部表示,猶閣需要凝聚共識。

衛福部社家署副署長 張美美表示:「社家署106年已經完成修訂,單身佮同志收養服務的工作指引,猶有收養人親職準備教育的課程」

司法院少年佮家事廳法官 徐淑芬指出:「欲放冗同婚關係會使共同收養子女,抑是一方欲收養他方的養子女,阮認為是符合人格發展的自由佮平等原則,本院樂觀其成」

抑若法務部政務次長 陳明堂示回應:「民間團體包括委員提出的困境,阮嘛有了解,今仔日的意見阮會閣做充分的思考」

法務部表示,社會當中確實猶有真濟無仝的意見,社會的經驗嘛是需要評估的部份,會繼續收集各界意見、提出檢討報告說明。

相關新聞

專題|全台敬老金大調查