18歲公民權修憲案 立法院今日全數同意通過

18歲公民權修憲案,今仔日佇立法院有109位立委出席,全體同意之下三讀通過。這也代表未來滿18歲的民眾,就有選舉、罷免、創制、複決的權利。這个修憲案公告半年了後的3個月內,愛進行公民複決。今仔日佇立法院門口,嘛有民間團體箍一陣對全臺灣各地頭來的高中生,做伙聲援這改的憲政改革。

「18歲青年欲投票,修憲承諾莫跳票」

幾十个來自台灣各地的高中生,25一透早就佇立法院門口集會,聲援立法院議場內、當咧審議的十八歲公民權修憲案。學生講,in是特別請假來關心。

在場聲援高中生表示:「有想欲歇病假,但是學校無批准,所以就是以事假,來參與這擺的活動。」

在場聲援高中生表示:「就是阮感覺,18歲其實心智年歲已經夠成熟,會使予阮來投票。」

臺灣青年民主協會理事長 張育萌表示:「2015年就算有迒黨派攏來提案,講18歲公民權愛來支持,但是落尾猶是失敗,咱這馬看著,總算有迒黨派的支持。」

立法院長,游錫堃:「修正通過。」

立法院下晡,佇109位立法委員出席、全數同意之下,18歲公民權修憲案三讀通過。但是民進黨批評國民黨佇過程中以否決權阻礙修憲;國民黨反擊,民進黨佇修憲過程是多數暴力。

民主進步黨立委,管碧玲表示:「我一路辛苦護送,一路辛苦推進,但是一路予國民黨指控,依法進行的所有程序,號做多數暴力。」

中國國民黨立委,曾銘宗表示:「民進黨一路駛緊車,嘛無尊重國民黨的意見,這毋是多數暴力,啥物是多數暴力?」

修憲案會佇公告半冬以後的三個月內,經過公民投票複決,時間猶閣愛等中選會審議決定。公民複決同意票愛超過965萬票、也就是全體選舉權人的一半才算通過。修憲的制限真懸,民間團體呼籲,朝野政黨攏愛佇各選區、說服選民投下同意票,才會使完成憲法改革。

相關新聞

專題|全台敬老金大調查