高雄史博館辦"雄中百年展" 見證打狗城市發展

高雄中學今年已經一百歲,這百年來,老師學生留下真濟回憶佮文物。這馬佇高雄歷史博物館舉辦雄中百年特展,這展覽也會當看著高雄,對日本時代到民主時代的轉變。

講著高雄中學,就想著紅樓、火車頭、卡其制服佮青色的冊包,對1922年日本時代的高雄州立中學校開始,雄中到今年四月初一拄好一百年,有真濟珍貴的老相片、教材教具佮學生課本等等文物。來參觀的校友想著家己的青春回憶。

高雄中學校長 莊福泰:「看起來平凡、毋是遐爾強調功績的展覽毋過煞是一个有深度意義的展覽。這个展覽內底,按呢百年重新整理,面對家己的文化。」

百年的雄中,行過日本時代、戰後到解嚴、民主,所以嘛會當看著日本時代學生軍的訓練,甚至228事件雄中自衛隊的老相片,這个特展特別用歷史的角度,來呈現學校的發展。

高雄市立歷史博物館副館長 李旭騏:「佇1947年這个學校佮規个台灣,經歷過一个無仝款的歷史事件,228事件的時陣,對學校學生老師有啥物影響?用歷史角度來介紹。」

為著百年特展,學校嘛共所有學生的畢業紀念冊數位化,校友真緊就會當揣著家己的老相片佮資料,百年雄中特別踏出校門,到歷史博物館展出,希望校友、民眾攏會當來走揣回憶,見證城市的發展。

全台敬老金大調查

相關新聞