有一个遊戲設計師，發現市面上的線頂學習語言，大部分攏是英語，母語的部份誠欠缺。伊就決心家己來做臺語囡仔古。毋但提臺灣文化做題材，這字幕閣有白話字、漢字、英語和日語。伊講這是予囡仔的禮物，為母語傳承繼續拍拚。
一齣一齣看著予人喙瀾咂咂滴的辦桌菜，對五福臨門到起家圓滿、正正台灣味。
動畫設計師 王少妤表示：「阮內底有一个口號是誠意食水甜，就是欲傳達你若是有心，用足簡單的物件就會當予人感動，這嘛是阮第二季想欲傳達的重點」
台語顧問 陳俐雯講：「你有可能目睭看著、喙啖著的、耳仔聽著的聲，伊會引起你頭殼內啥物款的記持，這就會當去吸引人來學這个母語」
設計團隊就佇有濟濟好食物的台南，團隊五个人，平均30歲，tshua頭的胡峻銘，成大資工系畢業，專門替國際大企業設計軟體，四、五年前做爸爸了後，發現台語的學習工具僫揣，囡仔攏講學英語較方便，伊就按呢家己出錢做台語囡仔古的app、紲落去錄台語歌謠、到這陣設計第二季的台語動畫，胡峻銘講這是送予囡仔的禮物。
科技公司遊戲設計師 胡峻銘表示：「雖然講袂講蓋趁錢，毋過會當聽、會當看，我感覺這是心適的。做一个老爸，予阮囝的一个禮物按呢。紲落去已經足濟學校、足濟老師提咱的動畫，提咱的影片予囡仔佇學校頂懸咧看，我是感覺足心適的啦」
古錐的動物bàng-gà主角，用全台語發音、紹介生活中的台語詞彙，字幕毋但有漢字敆羅馬字，也通揀英語、日語，團隊用熱情和科技專業結合台語，in講這只是開始，會繼續替後一代拍拚，也替母語傳承盡一份力。
