布袋戲國寶陳錫煌特展 向望傳統技藝莫斷根
陳嘉筠 賴威佐 / 屏東報導
發布時間：
更新時間：
目次
文化部頭一位認證的布袋戲重要傳統藝術保存者，人間國寶-陳鍚煌，今年已經92歲，目前猶閣咧教學生。伊毋但會曉搬布袋戲，連尪仔的戲服帽仔攏會曉做，這馬佇屏東有一个陳錫煌特展，這攏是老師規是人的心血，咱做伙來看。
一个人雙手弄兩身尪仔，陳錫煌已經九十二歲矣，動作猶原誠幼路，予遮的尪仔攏活起來，伊是文化部頭一个認證的布袋戲傳統藝術保存者，又閣是重要文化資產保存技術的保存者，毋過看著布袋戲漸漸欲無去，國寶級師傅一直咧牽學生。
這馬台後搬戲的，毋但有伊的徒弟，嘛有徒弟的後生，才11歲嘛會做伙搬布袋戲。
布袋戲大師 陳鍚煌表示：「布袋戲的物件誠歹學，看遐的角色看偌濟，毋但干焦聲，連尪仔的行路嘛無仝款。所以我請尪仔攏佮人無仝，按怎無仝？尪仔請出來我是當做人，你袂當共當做尪仔」
毋但搬戲，陳錫煌捌修復台北偶戲館收藏的18身尪仔，有的尪仔有百年歷史，伊嘛會曉做尪仔的衫佮帽仔，而且共遮的傳統工藝攏傳予後輩。
策展人兼同黨劇團團長 邱安忱表示：「其實伊(做戲帽)非常傷眼力，毋過做起來誠幼路，然後伊的做法真簡單」
屏東戲曲故事館，對18開始展出陳錫煌的特展，毋但有國寶的手藝，嘛有無形文化的傳承佮創新，陳錫煌上大的向望，就是傳統布袋戲會當繼續傳落去。
專題｜改造地獄路 台灣行人路為何難行？
