壓力綴收入增加 新竹19-64歲高血壓風險大

根據財政部綜合所得稅申報數字顯示,新竹市民以132.3萬提到全國第一,毋過收入愈懸,工作壓力嘛較大,佇2018-2010年7萬外个接受民間健檢的人數內底,已經有高血壓的就佔11.3%,高血壓高風險的人數,嘛來到28.9%。


民眾:「阮翁婿就是長期坐辦公室,所以就是較大箍,嘛是本身無去重視血壓」。

醫師 葉勳龍:「新竹是科技重鎮,科技業攏非常無閒,尤其是電子業,佇無閒的生活工課中,定定攏會袂記得身體健康,抑是生活緊張壓力,造成血壓升懸家己煞毋知影,上定看著的就是頷仔頸絚,尤其是後壁會絚閣有頭愣,攏是高血壓的現象」。


醫生講一般血壓若是佇120-140之間,就算是高血壓的前期,民眾愛特別注意。營養師嘛提醒。除了愛注意食的物件以外,運動嘛真重要。
 

營養師 林怡妏:「青菜水果有鎂佮鉀,對血管的彈性是有幫助的,其實坐上久對性命是較危險,所以建議若是會當得,一點鐘愛起來行五分鐘」。
 

事實上高血壓的患者年歲,有愈來愈少年的現象,定期做身體健康檢查,除了會使知影家己的健康狀況,嘛降低中風的風險。

 

全台敬老金大調查

相關新聞