相準無人機澍農藥有市 屏科大5校友回鄉創業

臺灣各地農村欠跤手,這馬出現用無人機濺藥仔的行業。有一陣屏科大畢業的少年家做伙創業,用無人機替農民濺藥仔。另外佇屏東農業智慧學校,有南部頭一个大型無人機考牌的機場,縣政府5月也欲辦無人機訓練課程,希望會當培養閣較濟人才。

無人機出動,佇這坵田濺藥仔,農業植保機是這幾冬才出現的新產業,33歲的林瓚良,六冬前就投入這途,這馬伊佮四位屏科大的學弟學妹,做伙轉來故鄉創業,就是相準無人機噴藥商機真大。

農業科技公司負責人林瓚良:「果子樹仔、菜蔬、花,全部整合起來。其實無人機佇農業的使用,比例猶是真少,我感覺這个市場猶未開發的程度足大。」

林瓚良進前家己替人用無人機濺藥仔,工課接袂完,年收入超過百萬,伊栽培學弟林于軒一冬,差不多欲出師,因為這種無人植保機至少25公斤,毋但愛有操作證,替人濺藥仔嘛愛有農藥代噴的證照,欲做這途無遐爾簡單。

農業科技公司經理林于軒:「台灣地小人洘秫秫,真濟障礙物,看著電火柱、建築物,對飛手是真困難挑戰。考照親像民航局、藥毒所這兩个證照,我感覺頭前需要有人tshuā領。」

全台目前提著雙證的無人機機師才一百六十外人,無照咧飛的人嘛袂少,佇屏東智慧農業學校,有南部頭一个大型無人機考照機場,屏東縣府按算五月欲開無人機訓練的課程,直接現地考照,培養閣較濟專業人才。

全台敬老金大調查

相關新聞