予音樂深入偏鄉 傳藝中心3/15開辦小學巡演

音樂的旋律多變化,會當演奏生活的各種滋味。為著欲予偏鄉的囡仔也有豐富的音樂資源,國立傳統藝術中心對舊年開始,辦理偏鄉音樂巡演計畫,透過音樂家的演奏佮分享,共音樂聲傳送到臺灣每一个所在。

改編台灣民謠蘭陽舞曲,活跳趣味的旋律,未來會佇台灣11間學校進行演出,這是傳藝中心第二年舉辦偏鄉音樂巡演計畫,今年安排台灣多元民族的音樂,予學生體會本土樂曲的美妙。

傳藝中心主任 陳悅宜表示:「會對3/15開始,先到頭一站苗栗的鯉魚國小,除了老師會演奏以外,猶會有導聆解說,予小朋友咧聽音樂的時陣,會當閣較了解音樂的意涵」

徛琴音樂家李哲音tshuā領偏鄉巡演團,上山落海去台灣的偏鄉國小演奏。李哲音講,上久的路途往回著十四點鐘,但是囡仔對音樂的興趣,就是上大的鼓勵。

李哲音講:「欲像按呢有一場音樂會,對IN來講是無啥可能,因為IN的所在實在太偏僻,所以咱共咱的樂器,搬去予IN看、予IN聽,我想對IN會有真大的影響」

新竹縣五峰鄉桃山國小校長 蘇美娟:「偏鄉的資源比較較欠缺,遮的資源到學校來,其實會當拍開囡仔看世界的窗」

今年的偏鄉音樂巡演計畫對3月15開始到5月中,分別會去新竹五峰鄉桃山國小等十間學校巡演,希望音樂聲傳遍每一角勢。

全台敬老金大調查

相關新聞