嘉義國際藝術紀錄影展 53齣片放送兼辦講座

影片記錄1964年白河大地動發生了後的情況，有彼當陣救災的情形，嘛有後來逐家整理家園的畫面，遮的珍貴影像資料是90外歲的紀錄片導演賴澄茂所翕的紀錄片，按算欲佇2022嘉義國際藝術紀錄影展來放送。

紀錄片導演賴澄茂講，「就是欲記錄這段歷史，予後代的人知，嘉義捌發生過這重大的災難，影像嘛留起來，予以後的人去思考。」

除了在地的歷史影像，這改的國際藝術紀錄影展，計共有53齣國內外的紀錄片，其中14齣是頭擺公開放送，主辦單位表示，今年有7个主題，閣有專業的講座，希望民眾除了看影片，嘛會當了解國外的文化佮藝術。

嘉義國際藝術紀錄影展藝術總監黃明川表示，「可能佇台灣，無任何影展會當表現出一種現代性、藝術性、文化性，閣有國際的連結佮觀點。」

這个影展對自3月11開始，一直到3月27，黃明川指出，配合影展的講座，有邀請一寡仔少年的藝術家做伙參與，希望透過IN的分享，予影展的內容有閣較多元的角度。