獨立媒體打造臺灣民防手冊 予大眾認捌戰爭

國防部佇今年成立全民防衛動員署,表示講會出版全民國防手冊發予民眾,提升民眾對戰爭的應變能力。這馬有民間的獨立媒體,參考軍事專家的意見佮外國的民防手冊,替臺灣打造一本民防手冊,提升民眾對戰爭的認捌佮準備。

滿滿一頁的插圖,緊急救難揹仔愛按怎準備、攏報你知。這是一本台灣獨立媒體,參考軍事專家佮國外民防手冊,經過一年準備,所出版的民防手冊「公民行動指南」,予大眾平常時就會使知影戰爭發生的時,應該按怎做,破除各種戰爭的迷思。

沃草專案經理蕭長展:「逐家對戰爭的觀念可能停留佇演習,抑是講停佇較以早的,猶毋過這馬的戰爭已經佮以前無相仝矣。無人機這款物件,伊漸漸會佇戰爭內底有一个重要的角色。因為台灣一直拄著混合戰這件代誌,這本手冊內底其實嘛有強調一个部份,尤其是假消息你愛按怎分別。」

因為露西亞參烏克蘭的戰事,台灣的自我防衛能力引起關注。國防部承諾會推出民防手冊發予民眾,提升大眾對戰爭的反應能力,目前當咧行政院審核。蕭長展認為,雖然民間版本的發行量無法度佮官方版本相比並,但是內容是較有伸勼空間。

沃草專案經理蕭長展:「這馬羅西亞的軍隊,伊可能假做是烏克蘭的軍隊。阮用畫圖的方式共逐家教講,咱愛按怎做敵人佮咱家己軍隊的識別,阮佇內底就有畫講咱台灣的軍隊可能會生做啥款、解放軍in可能會生做啥款,阮嘛寫佇內底。」

蕭長展表示,民間猶有真濟團體咧關心大眾對戰爭的認捌,按算會佮遮的團體合作,透過辦活動、猶閣有募資等等方式,做伙捒民防手冊,提升民眾對戰爭的認捌佮準備。

全台敬老金大調查

相關新聞