猶2萬違章工廠無納管 民團呼籲照期限斷水電

根據工廠管理輔導法規定,農地違章工廠申請納管今年3月20到期,若無請的,時間到著愛斷水電。這陣全臺灣猶有2萬外間違章工廠無申請,民間團體表示,冬外以來,已經接著千外件民眾檢舉陳情,呼籲政府著愛照品照行,這改莫閣跳票。

提民眾陳情的相片講這間起大約20年,彰化仲誼科技公司,這幾年定去予居民抗議鼻著臭味、排放污水,地方舊年認定伊是違章工廠,這陣工廠當咧申請納管,像按呢佇2016年05月20進前起的,農地低汙染違章工廠,有4萬5千間,不過干焦2萬外間申請納管,離申請期限3月20, 賰無一個月,民間團體呼籲時間到就愛斷水電,毋好閣跳票。

地球公民基金會台北辦公室主任吳沅諭:「這馬民進黨政府是講袂閣再開放,毋過阮看著農業縣立委已經開始咧講,要求欲放冗農產業群聚地區標準。佇這款的情況下,我們真正是真歹相信。敢會這款的納管期限會閣延展一改?」

政府佇2010年開始修正工廠管理輔導法開放納管,2014年、2019年展延兩改,等於予廠商三改就地合法的機會,不過這馬煞猶有一半的違章工廠,超過兩萬間猶咧觀望。民間團體表示,今年欲地方選舉,袂少猶未納管的廠商攏借弱勢的名義,要求政府繼續敨放,居民無奈只好轉向民間團體檢舉。

地球公民基金會山林國土組研究員蔡佳昇:「這兩年來阮收著1449件的回報,這是一種啥物款的地方政府公信力,會予所有人攏毋敢去佮政府檢舉,顛倒去揣一个民間團體檢舉

民間團體呼籲行政院落實約束,袂敨放納管期限,袂無限期就地合法、袂放寬農產業群聚地區認定;同時也希望地方政府增加稽查人力,因應3月20以後,斷水電的業務,也替整個產業做總盤點。

全台敬老金大調查

相關新聞