國內烏克蘭人籲俄國停戰 民團發起連署鬥聲援
鄭雅文 林郁凱/臺北報導
發布時間：
更新時間：
為著共故鄉鬥相共，佇臺灣的烏克蘭人參臺灣幾若个民間團體，到莫斯科臺北代表處頭前抗議，要求俄羅斯停戰，嘛懇求各界予協助。
佇台灣的烏克蘭人手攑國旗向望和平，但是戰爭到今第六工猶是予心碎，徛踮莫斯科台北代表處頭前抗議，也向望外界聲援。
佇台灣的烏克蘭人 Vadym呼籲，「假使若無想欲提供戰爭抑是軍隊武器，也通提供醫療物資佮藥物的幫忙，這真重要，你會當提供任何你會當幫忙的。」
佇台灣的烏克蘭人 Tanya表示，「你會使透過捐贈予別人食物，雖然無法度對臺灣送物件到烏克蘭，但是會當捐贈到波蘭，閣對波蘭送過去。」
由民間團體發起的抗議連署活動，短短幾工就有百外个台灣團體、欲四千人支持，IN呼籲政府愛參烏克蘭人徛做伙，也愛趕緊通過難民法、建立庇護機制、也表示佇露西亞政府停止侵略進前會持續連署。
台灣人權促進會秘書長施逸翔講，「這个連署的行動，無需要任何理由，因為這个就是，做為一个人上基本的道理。反侵略保障人權，這是普世價值。」
面對抗議，露西亞駐台北辦事處有派人接受連署。台灣也佇228暗暝啟動醫療物資的捐贈，內政部也允准佇台灣的烏克蘭人延長居留的時間。行政院也表示會開設賑災口座協助難民。
2022杭州亞運 台灣百金之路
