來臺傳教.推動白話字 臺文漫畫說巴克禮奉獻
記者 郭柏均 張育睿 / 台北報導
發布時間：
更新時間：
來講台灣歷史上發行上久，也是頭一份用白話字印的報紙，佇1885年出版的「臺灣府城會報」，出版人是清朝就來台灣的，英國宣教士巴克禮。巴克禮牧師為著傳教，費心神推廣白話字運動，這陣有少年創作者，用漫畫結合全台文，呈現牧師為土地、為母語奉獻的故事。
為著傳教，宣教士巴克禮佇1878年的台灣，開始推動台語白話字，嘛予當時的基層民眾開始捌字。這本全台文的bang2-ga3，畫的寫的，就是清國統治時期，來自英國的宣教士巴克禮的故事。
漫畫台文翻譯薛翰駿說：「伊應該是第五个來臺灣英國的宣教士，彼个時陣臺灣捌字的人足少，大概有九成的人攏毋捌字，彼个時陣就發見講，彼个時陣佇東亞抑是東南亞的宣教士，有咧用一套用羅馬字寫的白話字，伊感覺這套物件嘛是臺灣真需要的。」
為著推動白話字，巴克禮嘛開始引進現代印刷技術，出版台灣第一份報紙「臺灣府城教會報」，是以白話字編寫。bang2-ga3作者寧欣講，伊進前嘛有佇面冊迷眾頁，以趣味的方式推出宣教士馬偕的故事，因為社會、教會等等反應攏真好，就開始規劃巴克禮的故事。
漫畫作者寧欣分享講：「我欲畫的時陣，一開始就想講一定愛有一个外國人，因為臺灣是一个海島，所以有真濟外國人佇遮落地生根，比臺灣人閣較臺灣人，所以我就決定選一个宣教士來做，拄好巴克禮伊攏咧推廣白話字，就是臺語，真適合這个主題。」
巴克禮的故事有濟濟教會相關元素，薛翰駿講，因為無教會背景，佇翻譯的時、是定拄著困難。落尾參李江却台語文教基金會的陳豐惠合作，以台文聖經為基礎、做伙揣資料，完成這本bang2-ga3的翻譯。
