228事件75週年 嘉義市紀念館辦特展記錄歷史
林緯廷 嘉義報導
發布時間：
更新時間：
二二八事件到今75年矣，嘉義市政府今日佇二二八紀念碑頭前辦追思紀念會；嘉義市二二八紀念文教基金會嘛佇二二八紀念館展出舊年過身的紀念碑設計者─畫家詹三原的追思紀念畫展，閣有二二八事件嘉義地區的新聞手稿佮資料，希望民眾了解這段歷史對嘉義的影響。
一張一張的採訪手稿佮彼當陣的新聞報紙，記錄1947年二二八佇嘉義地區發生的新聞事件。嘉義市二二八紀念館舉辦二二八事件75週年的特展，對2/25開始，一直展到3/20。
嘉義市228紀念文教基金會董事長江榮森：「新聞紀事、電台的放送，猶閣有雙方、軍方佮民間開會的會議內容，這對還原嘉義地區二二八事件的真相非常有幫助。」
除了紀念館的展覽，佇二二八紀念碑頭前嘛有追思活動，這座紀念碑就是畫家詹三原的設計，前監察院院長張博雅表示，彼當陣為著這座紀念碑，毋但受著真大的壓力，連設計者嘛因此受迫害。
詹三原遺孀詹黃耿玉：「冒險共伊設計的這紀念碑起起來，第一座起起來了後，各縣市嘛攏講欲起，所以按呢，就共咱二二八事件規个攏呈現出來矣。」
嘉義市228紀念文教基金會董事長江榮森：「詹三原老師因為伊是設計全台灣第一座紀念碑，這座紀念碑佇落成的時，伊閣將畫作囥佇現場，予參加的來賓佇下跤簽名。」
嘉義市228紀念文教基金會表示，這改的紀念特展，有詹三原的畫作佮張岳楊的新聞手稿，閣有二二八事件的調查報告，希望透過遮的資料，欲民眾會當知影這段歷史佮真相。
