移工申訴後無通討趁 勞團籲開放調查中換頭家
鄭雅文 林郁凱 / 台北報導
發布時間：
更新時間：
目次
有一間誠出名、咧做西餅的公司，進前予人搤講有剝削移工的情形，目前案件閣咧調查。毋過申訴的移工煞無法度轉換頭家，經濟出現問題。臺灣國際勞工協會今仔日舉行記者會，呼籲勞動部先予移工轉換雇主，才看調查結果，敢是愛處罰本底的雇主。
出名的禮餅公司予人搤空講剝削移工，案件猶閣咧調查，毋過投訴的移工自舊年申訴到今，毋但袂當轉換雇主，也無工課通做，生活出現困難。
TIWA研究員 吳靜如表示：「一般本地的勞工會當有失業補助，會當趕緊閣揣頭路，IN就干焦苦苦等，毋知影啥物時陣才通有結果，然後這段期間攏無收入」
移工代表 阿瑩指出：「因為公司佮中人公司一直予阮壓力，有真濟人感覺傷忝有壓力，閣毋知愛閣等偌久、會有啥物結果，N就決定退出申訴」
法律若親像咧處罰4受欺負的人，TIWA表示，照目前的就業服務法規定，違法的雇主愛等到地方勞動檢查、處分了後、勞動部才通撤銷移工的聘僱，毋過往過流程攏拖真久，像這个案到這馬已經五個月，IN猶是等無轉換。立委邱顯智認為，勞動部應該佇處罰結果決定進前，先予移工轉換。
立法委員 邱顯智表示：「逐工逐工過，攏領無薪水。拄著這種惡質頭家的情況下，一个一个投降，我若會擋會牢，我投降交換惡質雇主，同意我轉換雇主，敢是按呢」
立委批評勞動部應該簡化調查程序，家己用檢查權介入，毋過勞動部表示，因為行政分工原則，目前猶是愛等地方政府調查的結果。假使調查出廠商違法，會趕緊佇三月中左右解除移工的聘僱許可。
