本土語言列必修 但支援教師待遇.薪水猶待改善

根據國家語言發展法,今年九月開始,本土語言課程著愛列入去國小、國中、高中的課程。根據統計,目前的本土語言的老師,有35%是教學支援人員。遮的教學支援人員薪水煞是真低,而且閣無穩定,今仔日 有立法委員開記者會,希望相關部會愛改善。

李美貞佇新北市的四間學校做本土語言的教學支援老師,無算是學校的正式員工,薪水的部份是領點鐘的,像李美貞這類的教學支援老師,大概佔整體本土語言老師的35%。

李美貞表示:「你按呢想看覓,這馬一節課是320,國小的部份是320,其實是無法度應付生活費的」、「我是有四間學校,但是有一寡仔老師只有一間學校」

教學支援老師的鐘點費,原住民語的部份國校360箍、國中400箍。台語、客語佇國校是一節320箍、國中360箍,李美貞就是這類。若是以李美貞的狀況來講,一禮拜16節、一個月4禮拜來算,本土語言教學支援老師一個月薪水差不多2萬箍左右,比基本工資閣較低。

母語教師協會代表 阮百靈表示:「咱無出勤就無收入,所以咱的寒暑假,無;國中假日歇睏,咱嘛無;風颱天,咱嘛無」

教育部國教署國中小組組長 林祝里回應:「阮確實嘛咧研議,教支人員in的鐘點應該調整,嘛佮地方政府共同討論了後,落尾才會使決定調整偌濟」

根據國家語言發展法,今年9月開始,本土語言就欲明確列入國校、國中、高中的課程,相關師資敢有整備完成?教育部表示,目前當咧過點各縣市需要的教師人數,嘛當咧積極培育相關師資。

相關新聞

專題|全台敬老金大調查