統計:囡仔人使用網路平均時數 假日有7點半鐘

有一份統計,講囡仔人佇假日平均一工使用網路的時間欲到七點半鐘,毋過兒童網路個資等等的問題欲按怎保護?今仔日就有公民團體佮學者,和政府單位召開公聽會,看按怎保護囡仔會較妥當。

高雄舊年9月,一陣學生對同學起跤動手,圍觀的人閣錄影片,佇網路頂四界傳,學生的學校、個人資訊攏有可能因此外流。類似的兒童隱私問題定定發生,民間團體18開公聽會,要求中央想法度解決。

公民參與媒體改造聯盟召集人林月琴:「我查某囝予人偷翕,我的厝攏予人公佈矣;若是遮的相片外流,逐家攏知影阮兜蹛佗位,我查某囝是啥人。」

根據網路內容防護機構iWin的統計,兒童逐工平均使用網路5.92點鐘,假日甚至是7.41點鐘,兒童網路個資保護是需要注意的重點。毋過民間團體認為,目前兒少法對事件的認定、監督關係的定義、裁處判斷標準等等攏欠明確。

公民參與媒體改造聯盟召集人林月琴:「遮的樣態,應該愛去訂定地方指導方針,針對網路規管佮裁罰,應該愛馬上啟動修法。」

衛生福利部保護服務司司長張秀鴛:「規个兒權法的69條抑是46條,伊對兒少的隱私部份,兒童的隱私包括家庭、住址、通訊,攏袂使隨意佮非法侵害,規範對象包括任何人。」

張秀鴛表示,針對兒童保障的相關法律,若是牽涉著性剝削,就佮刑法、性侵害犯罪防治法等等相牽連,目前行政院當咧tshua7領各部會進行討論。兒少權益保障法的部份,當咧衛福部處理,3月以後會公告,到時嘛會徵詢各界意見。

相關新聞

專題|全台敬老金大調查