北港迵新港復興鐵橋按修復 重建過去做糖歷史

878公尺長的復興鐵橋,連接嘉義新港佮雲林北港, 1982年台糖無閣使用了後,閣因為2008予大水沖斷去到今。十四早時,立法委員會同嘉義縣政府、交通部觀光局佮水利署,宣布欲進行鐵橋連結佮周圍環境的改善工程。

新港鄉長 林茂盛表示:「這條橋落去,會當變兩爿居民也好,抑是觀光客嘛好,更加會當連接佇這个所在活動」

嘉義縣長 翁章梁也講:「這條橋過去是鐵枝路,這馬號做橋,欲按怎予未來有無仝的功能,會當繼續來展現」

這條復興鐵橋過去對日本時代到民國60年代,除了載甘蔗以外,嘛是附近民眾出入、學生上下課的交通設施,知影橋欲來施工,地方的民眾嘛認為,這對新港佮北港歷史文化傳承,會帶來幫助。

在地藝術家 謝東哲表示:「會當用按呢起來佇四五公里的範圍,內底就會當去了解咱笨港的歷史,所以這是相當重要,阮地方嘛相當歡喜」

嘉義縣文觀局長 許有仁指出:「未來橋的兩爿,伊會增加跤踏車的車道設施,所以伊的橋面會拓寬,所以阮爭取有1億8千萬工程經費,會主要用佇這个部分」

過去北港溪的復興鐵橋,除了是走五分車的歷史施設,嘛因為連接北港佮新港兩个所在,替兩爿的民眾創造特殊的文化記持。修復工程按算今年4月動工,希望明年底會當完成,希望帶動新港佮北港的人文佮觀光。

全台敬老金大調查

相關新聞