北部當欠卵 農民指政府要求莫起價.無解決問題

講著物件起價,這陣上明顯的就是雞卵。因為天氣變化大,產量本來就減少,飼料成本閣變貴,濟濟農民攏講接載袂牢。𪜶不滿政府逐改攏用補助,要求𪜶莫起價,也有立委就批評,政府應該愛對源頭改變,防雞災、改善養飼的環境,才是解決問題的道理。

卵箱內底空空空,早起十點外,台北東湖市場這間雜貨的卵,就賣甲只賰這2袋。

菜市仔𥴊仔店頭家表示:「搶啦,逐家搶啦。你若逐家攏正常買的話,其實袂啦。你走兩逝一定買有一逝。」

頭家講這馬卵攏調有貨,只是賣的速度變真緊,有民眾一改就買40粒。

民眾表示:「按呢200外箍,256箍,驚死人矣。」

民眾喝講有夠貴,其實卵價對舊年10月一台斤33箍,到今年1月已經來到44箍,毋但變貴,北部閣較是對舊曆過年前就欠卵,雞農表示除了疫情致使原物料變貴、氣候影響產量,雞仔災問題也愛重視,批評政府干焦用補貼,要求業者莫起,根本治標無治本。

彰化卵農表示:「國際原物料一直咧起價當中,政府這斗宣布叫農委會莫起,阮產地雞卵袂當起價,問題阮成本提高,阮欲去共啥人討,阮毋就愛腹肚縖咧,莫食。」

民眾黨立委,邱臣遠表示:「你袂當一出代誌就做補貼,應該愛對源頭管理,可能是舊年卵雞需求過大的時陣,伊共𪜶撲殺,猶有雞災的問題,你到底疫苗有處理無?」

行政院表示,已經請農委會研擬生產補助措施,盡力協助卵農增加產量,減少生產成本。

相關新聞

專題|全台敬老金大調查