鶯歌陶瓷博物館推手機錄音導覽 8種語言攏會通

新北市鶯歌的瓷仔博物館,最近推出個人的導覽服務,民眾只要提手機仔,掃展覽品的QRCODE,就會有語音導覽服務,而且閣有台語、客語等等,無仝語言會當聽喔。

語音解說表示:「瓷仔佮台灣古早生活,關係密切,食飯的碗盤 睏的枕頭,書房的文具等等,攏會用著。」

用台語解說瓷仔的用途,民眾只要提家己的手機仔,掃描有語音導覽的牌仔,就會當聽真人錄音紹介展品內容。

鶯歌陶博館 教育推廣組長程文宏表示:「早期的話,當然阮博物館,也有提供用租借的語音導覽,因為有關衛生的方面,抑是防疫的方面,阮尤其佇今年,特別推出用家己的手機做載體。」

陶博館表示,這種透過個人手機仔收聽的導覽有八種語言版本,除了華語、台語、客語,嘛有手語,老師錄好影片協助聽障朋友,另外手機仔內底的解說,也通留落來。

鶯歌陶博館教育推廣組長 程文宏表示:「伊除了聲音以外,閣有影像參文字的內容,這寡對觀眾朋友來講,除了看展品佮聽說明以外,遮的影像閣有圖片佮聲音,甚至轉到厝裡,攏猶會使重複聽。」

陶博館指出,民眾來到遮通用家己的節奏來參觀,避免群聚,也通吸收專業的藝術智識。


 

全台敬老金大調查

相關新聞