"永續年夜飯特展" 呼籲改變食食習慣顧環保

過年食團圓飯,大魚大肉,家家戶戶攏煮甲真豐沛。毋過也有人主張講,食魚食肉,可能會致使閣較濟的汙染。國立臺灣博物館目前舉辦一個團圓飯的展覽,用環保的角度去看食食,向望民眾反思環境的議題。

規桌頂的菜像辦桌,毋過倚近看煞攏糞埽,有藝術團體共澎湖抾的海洋廢料成做圍爐的意象,創意之外也帶出悲傷。

國立台灣博物館教育推廣組研究助理方慧詩解說,「佇看袂著的所在,其實就予逐家知影講,咱食的物件內底,可能受平常時製造的塑膠影響、汙染影響。遮的汙染不只是影響著這馬的菜,閣汙染著可能是海洋的生物。」

策展人表示,民眾猶閣受著年節期間大魚大肉的傳統影響,但是時代變遷,飲食環境參以早無仝,IN希望用無仝族群的飲食,突顯出魚、肉佇食物供應鍊內底所製造的排碳、塑膠、汙染等等問題,予逐家思考,年節的食食敢有改變的可能性?

方慧詩也講,「逐家感覺過年愛大富大貴,一定愛食肉,但是這馬等於是,你平常時欲食肉真容易,所以咱其實會使思考一下 ,咱這馬的圍爐,是毋是真正是所謂的傳統。」

臺博館表示,IN自2016年起就會佇過年前舉辦「永續年夜飯」的特展,予逐家了解自產地到食飯桌頂的過程,改變年節觀念,像用青菜代替肉類、有夠食代替愛腥臊的觀念,希望逐家重新思考 人、節慶佮大自然的關係。

 

全台敬老金大調查

相關新聞