過年連假天氣變化 圍爐暝賰12度.初一初二回溫
郭柏均 林郁凱 / 台北報導
發布時間：
更新時間：
這擺的過年假攏總有9日，氣象局表示，年假期間的天氣變化誠大，對這馬開始變寒，初一初二較燒烙了後隨閣反冷，提醒逐家愛注意溫度變化。
街仔路的民眾外套穿牢牢，佮前幾工的好天氣無仝，氣象局估計，28天氣反涼，29受著南方雲系的影響，會有陣雨。紲落來到圍爐瞑，受著冷氣團影響，全台氣溫攏會閣再降低
氣象局氣象預報中心技正羅雅尹：「小年夜到圍爐暝影響的這波冷空氣強度，目前評估是冷氣團的強度。中部以北上低溫大概是12度到14度，南部佮中部是15度左右。」
氣象局表示，年假期間天氣變化大。拜六開始各地頭攏較冷、嘛有陣雨。禮拜到拜一圍爐瞑，水氣減少，冷氣團影響、天氣會愈來愈寒。初一到初二，冷氣團減弱，氣溫提懸，水氣小可仔增加。初三到初四鋒面通過、佮冷空氣南下，天氣閣再反冷，雨水嘛增加，一路影響到初六。
氣象局氣象預報中心技正羅雅尹：「溫度趨勢是呈現先冷、小可仔回溫，然後閣再變寒的狀況。整體來講，變化的幅度佮速度攏誠緊，序大、囡仔人、身體較虛的，可能愛特別注意保暖。假期當中南來北往可能愛注意南北的溫差。
年假期間敢有機會落雪？氣象局表示，圍爐暝凌晨雖然氣溫上低，但是水氣可能無夠。1月30、初一佮初二這三工，有可能佇3000公尺以上的懸山拄著落雪。
專題｜改造地獄路 台灣行人路為何難行？
