嘉義縣送年菜 助1500戶弱勢家庭過好年

嘉義縣政府佇過年進前,攏會招縣政府的員工來做志工,配合民間宮廟佮善心團體去關懷弱勢家庭。今年拄仔好是第十年,縣政府有欲到500名員工來參加,用200外台車,替18鄉鎮、計共1500戶的弱勢家庭,送年菜佮紅包,希望會當予IN好過年。

縣府的員工,無閒共物資搬去車頂,為著欲提供嘉義縣18鄉鎮,計共1500个弱勢家庭會當好好仔過圍爐暝,嘉義縣政府員工充任志工,欲來分送年菜。

吳小姐:「疫情期間各行各業攏誠辛苦,感謝縣政府閣誠感心,送年菜予囡仔加菜。」

嘉義縣佇舊曆過年進前,民間的宗教團體佮善心企業,攏會配合縣政府準備年菜欲送予弱勢家庭。因為嘉義縣山區海區所在闊,需要出動200外台車來鬥送,才趕會赴。

嘉義縣長翁章梁:「這十冬來,阮會當透過遮的捐贈人、縣政府的員工做志工,送去每一戶需要的家庭內底。我想這是一个公部門佮民間合作上好的典範。」

民眾:「送阮遮的年菜,熥熥咧就會當來食,逐家誠方便,誠好。」

受疫情影響,一寡仔弱勢家庭的生活是愈來愈辛苦,除了年菜以外,協助的宗教團體佮善心企業閣有另外包紅包。嘉義縣政府表示,今年各界捐助的年菜經費有371萬,比過去閣較濟,嘛希望這款的善心活動,會當繼續舉辦落去。

全台敬老金大調查

相關新聞