故宮南院春節特展配新裝潢 唌遊客到地參觀

嘉義縣故宮南院按算佇過年推出三大展覽,包括人人愛看的的翠玉白菜欲展覽到正月初六(2/6),閣有法華經的美術特展,而且會當予民眾查資料的亞洲藝術資料中心,嘛已經改裝完成,新正期間就會重新開放。

佇新完工的空間發表過年的特展,毋但有人氣國寶、閣有字畫佮宗教藝術的主題,嘉義縣故宮南院過年除了有活動,嘛共進前亞洲藝術資料中心重新裝潢,成做閣較好的閱讀空間。

學生,謝同學表示:「這爿閣有風景通看,就是如果想欲看冊看忝,閣會當起來行行咧,然後像遮閣有插座,如果欲紮電腦來做報告,嘛誠方便。」

國立故宮南院處長,彭子程表示:「經過這改的改裝,會當滿足阮未來欲囥十萬本冊的目標,另外就是講阮共傳統的冊櫃徙走了後,希望會當打造一个非常,逐家佮意的閱讀空間。」

除了展覽,故宮南院內底的餐廳,為著配合防疫佮服務人客,嘛推出機器人的𤆬位佮送餐服務,閣配合故宮的氣氛妝娗,希望會當創造話題。

業者,吳品諭表示:「疫情期間希望會當透過,AI機器人的送餐佮服務,會當減少佮人客的接觸。」

民眾表示:「按呢閣袂䆀,儘量減少接觸,嘛會當幫助疫情的控制。」

故宮南院表示,舊年受疫情影響,來故宮南院的遊客減欲三成,目前疫情的狀況猶是袂當放輕鬆,所以相關的防疫規定,毋但會繼續進行,未來嘛會配合中央的政策隨時調整。

全台敬老金大調查

相關新聞