五楊高架竹北欲起 居民:離徛家無30米吵人耳

為著解決國道1號新竹路段定定會窒車的問題,高工局研議欲共五楊高架做到頭份。毋過新竹縣竹北市興安里的里民就向立委陳情,講若是照這陣的設計落去做,車路離徛家會無到30公尺,生活品質會受影響。

新竹縣竹北市興安里的居民,佇家己蹛的大樓頭前搝抗議布條,反對目前五楊高架道路延伸的設計,講離人家厝傷過近,毋但吵,嘛一定會嚴重影響生活品質。

當地民眾表示:「第一排的住戶離無三十公尺,二十幾公尺爾爾,開門就是高速公路,後擺就是蹛佇地下室,毋是蹛佇平面。看無日頭,暗時只賰噪耳聲,規工是汙染」

依照目前設計,高架道路是雙爿攏拓寬,會去影響著當地兩千外戶的社區大樓居民,民眾希望會使改做單爿雙層規畫去設計,降低對環境的影響。

立委 林思銘指出:「西面公寓大樓誠濟,若是佇東面按照原先的規畫設計,設置孤一爿雙層按呢的規畫,我想整個對居民的影響就會減少」

抑若高公局總工程司 陳宏仁是回應:「針對原本的規畫方案,東面孤奇爿高層高架這个方案,兩个方案去做詳細的評估比較」

高速公路局表示,對這改民調無細膩共興安里民落勾去感覺真抱歉,後來已經補做,嘛會針對規畫的方案去做評估,四個月內完成了後,會閣再來開說明會。

相關新聞

專題|全台敬老金大調查