棗仔價數當好 高雄大社警方加強巡邏防偷挽

高雄大社的蜜棗,舊年受大水雨影響,產期延後,產量減少,閣拄著最近物價咧起,嘛影響蜜棗價數,這馬蜜棗大出,農民真驚著賊偷,警方特別規畫護棗專案,無定時加強巡邏,佮農民合作保護蜜棗。

大社的牛奶蜜棗,就親像細粒蘋果,這馬開始大出,農會人員這幾工無閒咧包裝,趕欲佇過年前出貨,嘛有民眾直接走來農會買。今年蜜棗受舊年大水雨影響,產季延後,產量減少,尤其大粒的價數,嘛淡薄仔起價矣。

大社農會總幹事 謝清標指出:「四兩上的,一公斤嘛愛拍到一百八十箍,百六至百八左右;若五兩上,今年特別少,拍到三百箍以上。但是這細粒的,三兩下的有較俗,差不多九十箍」

大社蜜棗才種100公頃,產量毋是高雄上濟的,毋過品質好,價數好,這兩冬定定有農民著賊偷,蜜棗全部予人偷挽去。

大社分駐所所長 紀健祥表示:「以無定時、無定點、無折站巡邏方式,共同保護本轄的三寶之一」

因為蜜棗產季開始,警方特別出動來護棗,加強果子園的巡邏,暗時看著警車的警示燈出現,農民嘛會感覺較安心。

全台敬老金大調查

相關新聞