繪本"尪仔博物館奇案筆記" 說臺灣歷來女權發展
鄭雅文 林郁凱 張育睿 / 台南報導
發布時間：
更新時間：
臺灣文學館最近出一本新的臺文繪本，叫做《尪仔博物館-奇案筆記》，繪本內底無仝角色的尪仔，代表無仝時代的女權人物，看繪本也會當了解臺灣的女權發展。
故事一開始，代表傳統女性的查某鬼尪仔雄雄自殺，後來記者尪仔介入，這是台文館最近新出的台文繪本尪仔博物館奇案筆記，用怪疑手法來描繪女權的發展。
台文館館長蘇碩斌：「記者就是用差不多一百冬前的楊千鶴，來做的模型來發展。伊就開始去調查，調查到落尾，咱才發覺講，原來是因為伊對伊一百冬前干焦會使做鬼來復仇這个方法，伊感覺已經無妥當，欲用啥物方法呢，伊講會當重生。」
對記者尪仔開始調查詩人尪仔、出版尪仔、社運尪仔等等，也象徵女性隨時代改變，參與寫冊、甚至上街頭，也結合原住民文化探討生命，故事內底也寫著無仝時代的女性作家創作，予逐家熟似性別、人權的重要。
台文館館長蘇碩斌：「譬如講這段，陳雪惡女書，這就是一个。伊是一个同志女作家，伊這个時間算佇台灣較早開始咧推廣同性作家的這个重要性。」
台文館表示，女權的發展是台灣歷史、文學的重要環節，查某鬼尪仔選擇重生，也顯示傳統女性到今選擇放開束縛脫胎換骨。
專題｜改造地獄路 台灣行人路為何難行？
