嘉義縣府招病院.學校開課 幫助長輩放慢退化

嘉義縣舊年失智的人口大約有9200外人,為著莫予序大失智失能的速度變緊,嘉義縣政府邀請病院佮學校,共同研發予序大激頭殼的課程教案,希望會當運用佇全縣29个失智據點。

舞台頂健康管理師tshuā序大綴歌謠演奏,台跤閣有衛生局配合病院佮學校,做伙研發的認捌課程,希望減慢序大失智的速度。

長庚醫院健康管理師 田老師指出:「有瑜珈律動,然後唱歌等等遮的活動,予序大動手,主要是動手,然後有思路方面的思考呈現」

嘉義縣長 翁章梁表示:「尤其這馬逐家年歲愈來愈大,失智的機率嘛較懸,如果咱無了解失智相關的症頭,欲來照顧一个失智患者會誠辛苦」

運用四季的花蕊,閣有無仝色水、形狀、數量的圖片,配合音樂教材,增加序大頭腦的運用,透過2個月的課程操作,序大嘛展現IN學習的成果。

大林慈濟醫院健康管理師 蕭老師指出:「有一寡仔是較早的tshit迌物仔,然後有一寡仔是手紩抑是黏貼的作品,這主要是訓練序大指頭仔肌力的動作」

嘉義縣衛生局指出,這个教案紲落來會推廣到全縣29个失智據點,而且閣有佮郵差配合醫療通報系統,請IN送批的時陣,注意社區序大的情況,予開始有失智症頭的序大,會當受著醫療體系照顧。
 

全台敬老金大調查

相關新聞