統計:舊年兒童交通事故21人死 並頂年加重倍

靖娟基金會統計,2021年兒童交通事故造成21个囡仔死亡,佮2020年的11个來比,是加一倍出來。大部份攏是因為無使用囡仔安全椅造成。

囡仔坐車時為著安全,多數家長攏會使用兒童安全椅。2020年交通部修法,2歲以下的兒童強制使用安全性較懸的後向式安全椅,經濟部嘛隨推出規範,舊年9月開始,國內廠商開始推出產品。

家長涂媽媽:「進前是聽朋友講,伊的體重到矣,抑是一歲了後就會使坐正向。今仔日聽講,希望2歲進前攏是反向較安全。」

靖娟基金會統計,2021年的兒童事故當中,交通事故造成21个兒童死亡,佮2020年的11个兒童相比並,是翻倍成長。而且研究2021年的死亡案例,大部份是無使用安全椅等等安全設備。

靖娟兒童安全基金會執行長林月琴:「疫情當中,台灣的狀況是因為自駕的狀況可能變較濟,較無使用大眾交通運輸工具。為囡仔準備一个後向式的安全椅,兩歲以下按照法規是一定愛做,兩歲以上囡仔頭骨穩定度無遐爾懸的時,應該猶是盡量揀選後向式的安全椅。後向比前向減75%的傷害。」

靖娟基金會表示,建議2歲以上嘛盡量採用後向式安全椅,雖然空間可能較狹,但是安全度加真懸。嘛特別提醒羽絨外套、風衣外套遮的衫的材質較滑,穿咧坐安全椅會降低安全性,建議坐安全椅進前愛先褪掉、固定好勢了後才崁佇囡仔身軀頂,安全性較懸。

相關新聞

專題|全台敬老金大調查