半暝噪音攪吵睏眠 高雄推聲音翕相科技掠改車

半暝若是有車哼哼叫,居民一定會感覺真困擾,高雄市環保局對舊年開始,利用一種聲音翕相的科技來取締,已經對違規的轎車、機車,開出20張罰單。

車猶未到,聲先到,一下子衝懸到89分貝,這台違規機車,馬上予電眼翕相,毋但山區,半暝佇市區嘛有機車吭吭叫,噪音嘛已經超標,會害附近居民歹睏,車主沒偌久就會收著環保局的罰單。

高市環保局空污與噪音防制科長朱進宏:「佇限速五十公里以下的道路,聲音翕相超過八十六分貝以上,就隨開罰。」

會當掠著噪音超標的車,因為環保局舊年開始利用這種聲音翕相的科技,佇民眾檢舉的路段,親像博愛路抑是美術館附近,閣有景點的道路,來取締iân-jín聲傷大聲的違規車輛。

高市環保局空污與噪音防制科長朱進宏:「翕著六十三萬台車;這六十三萬台,總共有二十台車超過咱道路噪音的標準,每一件會開罰一千八百箍以上。」

這馬的新科技,聽著聲就會當翕相,環保局提醒民眾莫超速,車輛嘛莫改裝煙筒管,製造傷吵的噪音受取締,會當罰千八到三千六。

相關新聞

專題|全台敬老金大調查