楠梓國小畢業旅行前一暝喝延期 學生失望傷心
陳嘉筠 賴威佐 / 高雄報導
發布時間：
更新時間：
目次
國內疫情緊張，學生的畢業旅行嘛受影響，高雄、屏東攏有學校，決定畢業旅行欲延期。因為高雄市教育局要求，去外縣市畢業旅行的學校，愛提出防疫計畫書，有國小本底今仔日欲出發，煞佇昨昏雄雄通知活動取消。
楠梓國小六年仔學生，18這工猶是來上課，IN攏是前一工暗時才接著學校老師通知，原底1/18欲出發去新竹、苗栗、台中的畢業旅行暫時取消，害IN誠失望。
楠梓國小的學生家長表示：「我會使接受，囡仔的反應是真正有淡薄仔傷心，畢竟物件攏款好矣」
學生誠失望，家長會當理解學校的苦衷，校長講因為17下晡四點才接著教育局的公文，所以臨時取消，可能改到下學期才辦。
楠梓國小校長 趙梓晴表示：「地點佮歇暝有本土疫情的縣市，就無法度去，必須愛有防疫計畫，交予教育局核准通過才會當出發」
高雄市政府要求學校去外縣市畢業旅行，愛提出防疫計畫，另外已經有袂少學校，已經共新課本提早發予學生紮轉去厝，為線頂上課做準備。
新上國小老師表示「阮可能會因為疫情關係，較慢開學，猶未確定，但是愛先做好準備」
新上國小休業式嘛改做線頂，老師用錄影片的方式提醒歇寒的代誌，實在是煩惱疫情若衝懸，學校著愛先做準備。
專題｜改造地獄路 台灣行人路為何難行？
