嘉義青農兼攝影師 記錄農村生活.展農民精神

十冬前轉來故鄉的黃名毅當咧溫室內底無閒種作。伊除了平常時種柑仔蜜，閣有另外一个身份，就是專門翕農民生活的攝影師，翕的相片閣捌提過攝影比賽的好成績。

攝影師，黃名毅表示：「本來其實我是一个，毋是蹛庄跤的人，我嘛是蹛佇都市，所以轉來的時陣感覺講，原來阮身軀邊，有誠濟真特別的畫面，真特別的產物，原來攏是庄腳定看著的物件。」

一張一張的相片，記錄農村內底的各種生活佮產業，黃名毅講，農村的穡頭雖然誠辛苦，但是有誠濟真媠的畫面、真好的故事，只是平常時逐家無去注意著。

攝影師，黃名毅表示：「我開始記錄了後，我了解抑是透過佮農民做簡單訪問了後，我得著遮的過程，其實對我來講是誠好的養份。」

黃名毅原本只是想欲用相片記錄家己種的柑仔蜜，因為感覺趣味所以愈翕愈濟，嘛記錄誠濟農民的生活，這馬伊嘛佮在地的青農組織一个平台，希望透過逐家的專長，予閣較濟人會當看著的農村的產業。