境外生變過勞工人 烏干達學生搤中州科大惡行

彰化的中州科技大學,有收對烏干達來的外國學生。毋過這寡外國學生煞跳出來指控學校,講𪜶無提著獎學金,老師攏用華語上課根本聽無,學校閣安排𪜶去工廠,煞攏做超過時間。這馬就有民間團體陪當事人出來開記者會,要求教育部著愛調查這款惡質的行為。

當事學生Collines表示:「過去這兩冬我佇臺灣,逐工工作超過十點鐘,捌三暝攏無睏,食排骨飯抑是一禮拜攏開40箍食飯。」

來自烏干達的Collines,原底聽中州科技大學承諾講,會使來台灣上全英語教學課程,而且有獎學金佮實習機會;但是來台灣了後遮的承諾攏變成空,學校甚至安排伊佇工廠超時工作。佇中州科大,閣有15个拄著佮Collines仝款問題的烏干達學生。

當事學生Collines表示:「我決定徛出來,因為我發現若是我無按呢做,真濟人的夢想攏會成做一場空,毋但是我爾爾,我有真濟朋友有相𫝛的情形。」

台灣人權促進會秘書長,施逸翔表示;「欠學生的後段私立學校、欠俗價勞工勞動力的企業、靠人口販運謀利的中人公司,三方共謀的新南向國際合作專班。」

Collines這馬轉學到靜宜大學。教育部初步認定中州科大牽涉重大違失事項,除了限期改善、專案輔導學校以外,嘛停止收境外學生佮扣補助款。民間團體講,Collines毋是唯一的個案,教育部愛有作為,阻擋學校剝削境外學生。

高等教育產業工會組織部主任,林伯儀表示:「你愛要求學校擔責任提出充分經費,愛提供完整的語言協助,愛提供獎助學金、專業師資,無政府你會使限制𪜶招境外生。」

教育部表示,若有發見雇用境外生的廠商違反就業服務法、抑是有人口販運的情形,會請勞動部佮檢方調查。針對民間團體要求全面調查各學校境外生的教學狀況,教育部表示,會列入每學期的教學品質查核作業。

相關新聞

專題|全台敬老金大調查