臺日模型大師聯合展出 60外件縮小作品唌人目

臺灣佮日本兩位做模型的大師做伙合作,對1/13開始,佇高雄欲展覽𪜶的微型人生,共𪜶囡仔時代的記持,全部縮小變做一件一件幼路的模型創作,攏總有60外件作品,其中閣有疫情指揮中心的縮小版本,做伙來看𪜶幼路的功夫。

中央疫情指揮中心記者會現場,這是台灣人這兩冬,誠熟似的場面,毋過這其實是縮小20倍的模型,是鄭鴻展開一個月時間創作的。

模型創作者,鄭鴻展表示:「遐的桌仔椅仔,完全是模擬我收集來現場的相片。」

閣有這件,共修理鐘錶的店頭縮小囥佇八角掛鐘內底,手路真幼秀,這攏是鄭鴻展上新的作品。這个展覽是鄭鴻展佮日本電視冠軍模型大師山田卓司聯手,不管是𥴊仔店、街路、抑是夜市仔的雞排店,猶閣有另外一區是日本昭和時代的風景佮店頭,兩位模型大師共𪜶細漢時的回憶,縮小成做一件一件幼路的作品。

創作者,鄭鴻展表示:「上早是看著日本人咧做這種模型,會當共一間商店內底,共機器人做甲遐爾仔真,我真感動的情形下,開始去收集資料。」

鄭鴻展本底是設計師,六冬前才開始做模型,伊定定共生活中的廢棄物,提來做這種有古早味的模型。

創作者,鄭鴻展表示:「做作品時陣敢若減啥物物件,若是紙類的,就去紙箱遐僥僥的,若是塑膠的,親像欠一塊杯仔,就去找卵殼,鉸落來做透明的杯仔。」

這个微型人生展,是因為疫情延到今年,佇高雄國立科學工藝博物館展出,予人感受著縮小的世界,嘛誠有人情味。

相關新聞

專題|全台敬老金大調查