下揖村排水溝糞埽摒袂完 嘉義民眾無奈陳情

嘉義東石的下揖村,有一位68歲的村民,伊對20冬前發見講細漢的時,定定去耍的六腳大排變做糞埽堆,只要有閒就會去摒掃,毋過20冬過去,猶是摒袂清氣,只好向政府陳情。

對大排內底共糞埽清出來,駁岸頂面閣有一大堆等欲清理,東石鄉六腳大排一直以來攏積誠濟糞埽,佇下揖村有一位村民張永琳,自20冬前開始逐工攏利用時間來遮摒糞埽,毋過情況猶是完全無改變。

下揖村民,張永琳表示:「今仔日所見是冰山一角,我對水頭抾已經抾來到遮,按呢二十年,二十年較抾著抾袂完。」

下揖村民,洪先生表示:「較無好就是尤其像遮的農藥罐仔,這農藥罐仔,這農民你看,透透咧用用咧,自按呢直接抨落去這河川。」

六腳大排經過新港、六腳、東石,是嘉義縣重要的排水設施,張永琳講,細漢時陣攏佇遮耍,毋甘這馬變甲遮垃圾,但是20冬來糞埽就是清袂完,希望相關單位會當重視。

嘉義縣環保局長,張根穆表示:「我會去了解講,咱六腳大排水尾遮的糞埽,伊水頭的來源大概是佗位的排水,猶是啥物河道較嚴重,阮嘛會針對糞埽是啥物類別,阮嘛會來調查。」

環保局指出,六腳大排長數十公里,會來評估設置監視器的方案,嘛會配合水利單位、農業單位來清理佮預防,希望減少河川的糞埽,避免糞埽流出海,汙染海洋。

全台敬老金大調查

相關新聞