臺北市開放春節居家服務預約 疫情中申請增加

為著予一寡家庭照顧者佇年節仔時有通歇睏,臺北市衛生局開放民眾提早預約居家服務照顧,也提供細序仔無佇國內的獨居老人申請。這兩冬受著疫情影響,申請的數量比往過閣較濟。

敲電話確認獨居老人年節時敢有照顧的需要,月底就欲過年,台北市的居家服務合作單位紅十字會就驚有序大無序細通照顧,特別先共關心。

中華民國紅十字會台灣省分會副組長陳信甫:「像最近敢毋是有報(旅館)染疫的問題,就有服務的對象認為講,今年(序細)猶是莫轉來好矣。」

紅十字會表示,除了孤單徛(KOO-TUANN-KHIĀ)的老人需要照顧,為著予厝內有65歲以上失智、失能長輩的家庭的照顧者,佇年節時通歇喘,IN攏有提供年節預約的居服照顧。這兩冬年因為疫情,預約的家庭有較濟。以紅十字會來講,普通時仔一個月大約服務百五个案,年節時差不多賰四成會申請,今年受疫情佮檢疫期間搝長影響,閣有一寡序細佇國外的序大,需要照顧的情形就變濟。

中華民國紅十字會台灣省分會副組長陳信甫:「原本有四成的人申請,提懸到大概五六成。」

北市衛生局長期照護科科長劉惠賢:「這个預約的部份,阮是希望講會當冗早,上好是1月初10進前就會使敲這支電話來預約。」

台北市衛生局表示,根據過去平均申請的案量差不多落佇兩千件左右,民眾只要敲1966預約,IN攏會盡量安排,另外紅十字會也表示。考量年節人力,會留八成的居服員來服務民眾,薪水也會照勞基法來支付。

全台敬老金大調查

相關新聞