新竹峨眉湖遊艇停駛8個月 元旦閣再恢復營運

美麗的峨眉湖風景，坐佇船頂看過去湖面有完全無仝款的感覺，進前因為疫情影響加上合約到期，停駛8個月的峨眉湖環湖遊艇，元旦這工重新恢復營運，遊客總算會使坐船欣賞，感覺真歡喜。

遊客感覺「閣袂䆀，因為我無來過，這是第一擺。」也有遊客講，「知影這有電動的船仔，就tshuā囡仔來，較早是無特別來坐船。」

業者講疫情轉和以後，閣搪著合約到期無就法度營運，這幾個月來完全無收入，實在真歹過，真期待重新開放會使紮來業績。

遊艇業者講，「進前是因為疫情影響，後來是合約到期重新招標簽約。所以今年一月初一重新營運，畢竟停了遮久，我相信逐家嘛真期待阮趕緊恢復。」

這改業者引進兩隻較無汙染的電動遊艇，一逝遊湖行程30分鐘，配合船頂的導覽，希望遊客除了欣賞風景，嘛更加了解峨眉湖的特色。