二二八紀念館招馬國藝術家 促進關注香港處境

文化新眼界,來看香港自反送中了後,處境就真艱難,尤其最近立場新聞關起來,頭人也攏予掠走,予人真煩惱。臺灣二二八國家紀念館,最近就邀請馬來西亞藝術家李迪權,展出以反送中運動做主題的版畫作品,希望各界繼續關心香港局勢。

版畫呈現警察攑棍仔拍人、抗議民眾攑雨傘抵抗等等,馬來西亞的藝術家李迪權,將進前到香港看著的反送中運動、新聞報導用版畫創作,嘛有作品隱喻家己佇香港國安法通過以後被迫取消工課的心情。

二二八國家紀念館專員陳文恬講,「另外有一種呈現方式就是,因為伊無法度展出伊的作品,所以伊只好用仝款數量的白紙。遮的白紙親像,有一種予噤聲的概念,也是一種,白色其實也是一種無聲的抗議。」

館方表示,白色也象徵台灣過去發生的二二八、白色恐怖事件,作者將自身的觀察用版畫記錄、創作,也特別共進前大學生支持反送中的連儂牆復原、保留落來。

陳文恬表示,「其實反送中事件,已經較消失佇逐家的面頭前。但是其實反送中這个運動,抑是香港人權受著迫害的這个事實,到目前為止攏抑是當咧進行的。」

館方希望透過香港議題,喝醒逐家對人權的關注,也成做台灣的一面鏡,予逐家知影講維護人權無人會當激外外 。

相關新聞

專題|全台敬老金大調查