高雄新都社會住宅動土 閣4棟當咧起.拚4年徛1萬戶

高雄市政府今仔日佇愛河邊舉辦新都段社會住宅的動土典禮,今年度高雄攏總有4个社會住宅當咧起,目標一萬空五百戶。市府嘛通過欲抾囤房稅,會增加三億的稅收,欲來補貼少年人稅厝。

高雄新都段社會住宅動土,基地徛佇美術館佮愛河邊仔,算是高雄黃金地段,按算欲起11樓、114戶,一房到兩房的厝,而且閣有托嬰中心,未來欲予少年人佮弱勢家庭優先申請。

高雄市都發局長吳文彥:「今年有四搭,明年一搭工地。另外國家住都中心有九搭佇高雄,佇連紲四年內,攏總欲起一萬空五百戶。」

新都段社會住宅按算113年完工,市府佮國家住都中心合作,有真濟工地當咧起平價的住宅,目標萬捅戶,而且市府才通過囤房稅,估計會增加三億稅金,欲用來補助少年人稅厝的租金。

高雄市長陳其邁:「推動囤房稅,對囤房稅收增加青年稅厝補貼,大概會增加一萬戶左右。」

都發局表示,明年閣會推出社會住宅用地,目前有五个所在當咧評估,社會住宅數量會逐年增加,保障青年佮弱勢民眾蹛的權益。

相關新聞

專題|全台敬老金大調查