媒體素養教育博覽會 望加強民眾分辨資訊真假

網路時代,消息傳真緊,為著避免假消息傳播,教育部今仔日辦媒體素養教育博覽會,展示民間做陣推動媒體的成果。學者表示民眾對媒體素養和資訊判斷的能力猶有真長的路愛行,按怎佇社群平台擴大文明而且理性的討論,是咱會當思考的。

12月20開始,社群網站流傳假消息,講台灣開放豬農使用瘦肉精,台灣事實查核中心隨用貼文掰會,澄清台灣並無開放使用瘦肉精。教育部舉辦2021媒體素養教育博覽會,佮社群媒體、消息查證組織等等單位合作,以濟濟方式加強民眾的媒體識讀能力。雖講媒體識讀課程有融入佇教育階段,毋過行政院承認講,做了猶是無夠。

行政院政務委員兼發言人 羅秉成表示現此時網路上,深度偽造的訊息猶是影像,已經影響著咱的生活,分階段的媒體識讀教育,阮猶有一寡努力的空間,透過這款的博覽會,逐家鬥陣合作分享經驗,會使共各種媒體素養的教材、師資訓練,會使推廣到各種需要的族群,因為看起來是有這个需求,但是咱能量猶閣無夠。
­­
學者嘛認為,現階段的媒體素養教育確實猶有需要加強,建議除了教育,成果的檢驗機制也真重要。

中正大學傳播學系教授胡元輝指出到底遮的教育的成果如何,咱是毋是愛有一个具體的指標,咱來了解講到底學生學習了,伊的效果按怎,老師接受培訓了後,伊到底是按怎來教,伊教育的品質是毋是有增加。

羅秉成表示,媒體識讀教育的成果,無法度短期看著效果。假消息一直行佇咱頭前,需要政府迒部會、佮民間團體長期合作,破除假消息的傳播,才會當提升民眾的媒體素養。



 

全台敬老金大調查

相關新聞